"ಅವಳ ಹೆಜ್ಜೆ" ಮಹಿಳಾ ಕನ್ನಡ ಕಿರುಚಿತ್ರೋತ್ಸವ
"ಅವಳ ಹೆಜ್ಜೆ" ಮಹಿಳಾ ನಿರ್ದೇಶಿತ ಕನ್ನಡ ಕಿರುಚಿತ್ರೋತ್ಸವ
2025ರಿಂದ ಪ್ರಾರಂಭವಾದ ಗುಬ್ಬಿವಾಣಿ ಟ್ರಸ್ಟ್ ಆಯೋಜನೆಯ "ಅವಳ ಹೆಜ್ಜೆ ಕಿರುಚಿತ್ರೋತ್ಸವ" ಕೇವಲ ಕಿರುಚಿತ್ರ ಪ್ರದರ್ಶನವಲ್ಲ. ಮಹಿಳೆಯರ ಅನುಭವ, ದೃಷ್ಟಿಕೋನಗಳಿಗೆ ವೇದಿಕೆ ನೀಡುವ, ಲಿಂಗ ಸಮಾನತೆಯ ಚಿಂತನೆಗೆ ಉತ್ತೇಜನ ನೀಡುವ ಮತ್ತು ಮಹಿಳಾ ಸಬಲೀಕರಣದ ಧ್ಯೇಯವುಳ್ಳ ಒಂದು ಸಾಂಸ್ಕೃತಿಕ ಚಳವಳಿ.
ಕ್ಯಾಮೆರಾ ಹಿಂದೆ ಮಹಿಳೆ ಇಲ್ಲದಿದ್ದರೆ, ಪರದೆಯ ಮೇಲಿನ ಮಹಿಳಾ ಪಾತ್ರಗಳು ಕೇವಲ ಗ್ಲಾಮರ್ ಗೆ ಸೀಮಿತವಾಗುವ ಅಪಾಯವಿದೆ. ದೃಶ್ಯಮಾಧ್ಯಮವು ಮಹಿಳೆಯರ ಬದುಕು, ಕತೆಗಳು ಮತ್ತು ದೃಷ್ಟಿಕೋನಗಳನ್ನು ಪರಿಣಾಮಕಾರಿಯಾಗಿ ಬಿಂಬಿಸಲು ಶಕ್ತಿಯುತವಾಗಿರುವುದರಿಂದ, ಮಹಿಳಾ ನಿರ್ದೇಶಕಿಯರನ್ನು ಪ್ರೋತ್ಸಾಹಿಸುವುದು ಹಾಗೂ ಅವರ ಕಥನೆಗಳಿಗೆ ಸಬಲ ವೇದಿಕೆ ಒದಗಿಸುವುದು ಈ ಚಿತ್ರೋತ್ಸವದ ಮುಖ್ಯ ಉದ್ದೇಶವಾಗಿದೆ.
ಗುಬ್ಬಿವಾಣಿ ಟ್ರಸ್ಟ್ ಪ್ರಾಯೋಜಿತ "ಅವಳ ಹೆಜ್ಜೆ" ಕಿರುಚಿತ್ರೋತ್ಸವ - 2027 ಪ್ರಯುಕ್ತ ಕನ್ನಡ ಕಿರುಚಿತ್ರ ಸ್ಪರ್ಧೆ
ಅರ್ಹತೆ:
-
ಭಾಷೆ ಮತ್ತು ನಿರ್ದೇಶನ: ಕಿರುಚಿತ್ರಗಳು ಕನ್ನಡದಲ್ಲಿರಬೇಕು ಮತ್ತು ಚಿತ್ರದ ನಿರ್ದೇಶಕರು ಮಹಿಳೆಯೇ ಆಗಿರಬೇಕು.
-
ನಿರ್ಮಾಣದ ವರ್ಷ: ಚಿತ್ರ ಪೂರ್ಣಗೊಂಡ ವರ್ಷ 2025, 2026 ಅಥವಾ 2027 ಆಗಿರಬೇಕು.
-
ಅವಧಿ: ಕ್ರೆಡಿಟ್‌ಗಳ ಸಹಿತ 5 ರಿಂದ 30 ನಿಮಿಷಗಳ ನಡುವೆ ಇರಬೇಕು.
-
ಕಥಾವಸ್ತು: ಮಹಿಳಾ ನಿರ್ದೇಶನದ ಎಲ್ಲಾ ವಿಷಯಗಳ ಕಿರುಚಿತ್ರಗಳು ಸ್ವಾಗತಾರ್ಹವಾದರೂ ಮಹಿಳಾ ಮುಖ್ಯ ಪಾತ್ರ ಅಥವಾ ಮಹಿಳಾ ಸಬಲೀಕರಣ, ಲಿಂಗ ಸಮಾನತೆ, ಮತ್ತು ಸಂಬಂಧಪಟ್ಟ ಸೂಕ್ಷ್ಮತೆಗೆ ಬದ್ಧವಾಗಿರುವ ಚಿತ್ರಗಳಿಗೆ ಹೆಚ್ಚಿನ ಪ್ರಾಮುಖ್ಯತೆ ನೀಡುವುದು, ಅದರಲ್ಲೂ ಹೊಸ ವಿಷಯಗಳು ಮತ್ತು ಹೊಸ ದೃಷ್ಟಿಕೋನಗಳಿಗೆ ಒತ್ತು ಕೊಡುವುದು ಈ ಚಿತ್ರೋತ್ಸವದ ದೀರ್ಘಕಾಲಿಕ ಉದ್ದೇಶ.
-
ಇಂಗ್ಲಿಷ್ ಉಪಶೀರ್ಷಿಕೆ: ಇಂಗ್ಲಿಷ್ ಉಪಶೀರ್ಷಿಕೆಗಳು ಕಡ್ಡಾಯವಲ್ಲ, ಆದರೆ ಇದ್ದರೆ ಉತ್ತಮ.
-
ರೂಪಾಂತರಗಳು ಮತ್ತು ಸಾಕ್ಷ್ಯಚಿತ್ರಗಳು: ಬೇರೆ ಕಥೆಗಳ ರೂಪಾಂತರಗಳಿಗೆ (Adaptations) ಅವಕಾಶವಿದೆ; ಆದರೆ ಸ್ವಂತಿಕೆ ಮತ್ತು ನಿರ್ದೇಶಕಿಯ ದೃಷ್ಟಿಕೋನಕ್ಕೆ ಹೆಚ್ಚಿನ ಆದ್ಯತೆ. ಸಾಕ್ಷ್ಯಚಿತ್ರಗಳನ್ನು ಸಲ್ಲಿಸಬಹುದು, ಆದರೆ ಇತರ ಕಿರುಚಿತ್ರಗಳೊಂದಿಗೆ ಒಂದೇ ಮಟ್ಟದಲ್ಲಿ ಸ್ಪರ್ಧಿಸಬೇಕಾಗುತ್ತದೆ.
-
AI ಮತ್ತು ತಂತ್ರಜ್ಞಾನ: ನಿರ್ದೇಶಕಿಯರು AI ತಂತ್ರಜ್ಞಾನವನ್ನು ಕಲಿತು, ಬಳಸುವುದಕ್ಕೆ ಪ್ರೋತ್ಸಾಹವಿದೆ. ದೃಶ್ಯಗಳು ಮತ್ತು ಅನಿಮೇಷನ್‌ಗಾಗಿ AI ಬಳಸಬಹುದಾದರೂ ಕಥೆ, ಸೃಜನಶೀಲ ಪರಿಕಲ್ಪನೆ ಮತ್ತು ನಿರ್ದೇಶನ ಮನುಷ್ಯರದ್ದೇ ಆಗಿರಬೇಕು.
-
ಹಿಂದೆ ಸಲ್ಲಿಸಿದ್ದ ಚಿತ್ರಗಳು: "ಅವಳ ಹೆಜ್ಜೆ" ಕಿರುಚಿತ್ರೋತ್ಸವದ ಹಿಂದಿನ ಆವೃತ್ತಿಗಳಿಗೆ ಸಲ್ಲಿಕೆಯಾಗಿದ್ದ ಕಿರುಚಿತ್ರಗಳನ್ನು ಈ ವರ್ಷ ಸ್ಪರ್ಧೆಗೆ ಪರಿಗಣಿಸಲಾಗುವುದಿಲ್ಲ.
ನವಂಬರ್ 1, 2026 ರಿಂದ ಮಾರ್ಚ್ 14, 2027 ವರೆಗೆ ಕಿರುಚಿತ್ರ ಸಲ್ಲಿಕೆಗೆ ಕಾಲಾವಕಾಶವಿದೆ.
ಪ್ರವೇಶ ಶುಲ್ಕ:
-
ರಾಜ್ಯೋತ್ಸವದ ಅಂಗವಾಗಿ ವಿಶೇಷ ವಿನಾಯಿತಿ: ನವಂಬರ್ ತಿಂಗಳಿನಲ್ಲಿ ಪ್ರವೇಶ ಶುಲ್ಕ ₹0 ( ಸಂಪೂರ್ಣ ಉಚಿತ)
-
ಕಿರುಚಿತ್ರ ಸಲ್ಲಿಸಲು ಸಾಧಾರಣ ನೋಂದಣಿ ಗಡುವು: ಫೆಬ್ರವರಿ 28, 2027. ಪ್ರವೇಶ ಶುಲ್ಕ ₹1,000
-
ತಡವಾದ ನೋಂದಣಿಗೆ ಕಟ್ಟ ಕಡೆಯ ದಿನಾಂಕ: ಮಾರ್ಚ್ 14, 2027. ಪ್ರವೇಶ ಶುಲ್ಕ ₹1,500
ಅರ್ಹತಾ ಮಾನದಂಡಗಳಿಗೆ ಹೊಂದಿಕೆಯಾಗಿರುವ ಎಲ್ಲಾ ಕಿರುಚಿತ್ರಗಳನ್ನು ತೀರ್ಪುಗಾರರ ಸಮಿತಿ ಪರಿಗಣಿಸಿ, ಉತ್ತಮ ಕಿರುಚಿತ್ರಗಳನ್ನು ಸ್ಪರ್ಧಾತ್ಮಕ ಪ್ರದರ್ಶನಕ್ಕಾಗಿ ಆಯ್ಕೆ ಮಾಡುತ್ತದೆ.
"ಅವಳ ಹೆಜ್ಜೆ" ಪ್ರಶಸ್ತಿ
ಸ್ಪರ್ಧಾತ್ಮಕ ಪ್ರದರ್ಶನಕ್ಕೆ ಆಯ್ಕೆಯಾದ ಕಿರುಚಿತ್ರಗಳಲ್ಲಿ ಅತ್ಯುತ್ತಮ ಕಿರುಚಿತ್ರಕ್ಕೆ ₹1 ಲಕ್ಷ ನಗದು ಬಹುಮಾನ, ಪ್ರಮಾಣಪತ್ರ ಮತ್ತು "ಅವಳ ಹೆಜ್ಜೆ" ಪ್ರಶಸ್ತಿ ಫಲಕ
ಪ್ರದರ್ಶನ ಪ್ರಮಾಣಪತ್ರ
ಚಿತ್ರೋತ್ಸವದಲ್ಲಿ ಪ್ರದರ್ಶಿಸುವ ಎಲ್ಲಾ ಕಿರುಚಿತ್ರಗಳಿಗೆ "ಪ್ರದರ್ಶನದ ಪ್ರಮಾಣಪತ್ರ" ನೀಡಲಾಗುವುದು.
ವಿಶೇಷ ಮಾನ್ಯತೆ ಬಹುಮಾನಗಳು
ಕೆಳಗಿನ ವಿಶೇಷ ವರ್ಗಗಳಲ್ಲಿ ತಲಾ ಒಂದು ಕಿರುಚಿತ್ರಕ್ಕೆ ₹10,000 (ಹತ್ತು ಸಾವಿರ) ನಗದು ಮತ್ತು ವಿಶೇಷ ಮಾನ್ಯತೆ ಬಹುಮಾನದ ಪ್ರಮಾಣಪತ್ರ ಪಡೆಯುವ ಅವಕಾಶವಿದೆ.
ಗಮನಿಸಿ: ಎಲ್ಲಾ ಸಲ್ಲಿಕೆಗಳನ್ನು "ಅವಳ ಹೆಜ್ಜೆ ಪ್ರಶಸ್ತಿ"ಗೆ ಪರಿಗಣಿಸಲಾಗುತ್ತದೆ. ಅದರ ಜೊತೆಗೆ, ಗುಬ್ಬಿವಾಣಿ ಟ್ರಸ್ಟ್ ನ ಧ್ಯೇಯೋದ್ದೇಶ, "ಅವಳ ಹೆಜ್ಜೆ" ಯ ಪರಿಕಲ್ಪನೆಗೆ ಪೂರಕವಾಗಿರುವ ಅಥವಾ ಆಧುನಿಕ ಸೃಜನಶೀಲತೆ, ಸಮಕಾಲೀನ ವಿಷಯಗಳ ಕಿರುಚಿತ್ರಗಳನ್ನು ಪ್ರೋತ್ಸಾಹಿಸುವ ಉದ್ದೇಶದಿಂದ ಈ ವಿಶೇಷ ವರ್ಗಗಳನ್ನು ಕಲ್ಪಿಸಲಾಗಿದೆ.
-
ಗೂಡಿನಿಂದ ಗಗನದೆಡೆಗೆ: ಕ್ರೀಡೆ, ಉದ್ಯಮ, ನಾಯಕತ್ವ
-
ಸ್ತ್ರೀ ಒಗ್ಗಟಿನಲ್ಲಿ ಬಲವಿದೆ
-
ಸಂಪ್ರದಾಯಕ್ಕೆ ಸವಾಲು, ಚೌಕಟ್ಟಿನಾಚೆ
-
ಅಸ್ಮಿತೆ, ಅಸ್ತಿತ್ವ, ಅನ್ವೇಷಣೆ
-
ಸಾಮಾಜಿಕ ಬದಲಾವಣೆಯ ಕಥಾವಸ್ತು
-
ಹಾಸ್ಯ, ವ್ಯಂಗ್ಯ, ವಿಡಂಬನೆ
-
ವಿಜ್ಞಾನ ಆಧಾರಿತ ಕಲ್ಪನೆ
-
ಅನಿಮೇಷನ್, ಎಐ, ಇತರೆ ತಂತ್ರಜ್ಞಾನ ಆಧಾರಿತ
-
ಉದಯೋನ್ಮುಖ ನಿರ್ದೇಶಕಿ - 21ನೇ ಶತಮಾನದಲ್ಲಿ ಜನಿಸಿದ ಮಹಿಳೆಯರು ನಿರ್ದೇಶಿಸಿದ ಕಿರುಚಿತ್ರ
